КУЛІК Яўген Сяргеевіч
(31.10.1937. Мінск – 2003), беларускі графік. Скончыў Беларускі тэатральна-мастацкі інстытут (1963). У станкавых творах распрацоўваў тэмы гісторыі і культуры, спадчыны беларускага народа: серыі “Помнікі дойлідства Гродзеншчыны” (1974), “Славутыя дзеячы гісторыі і культуры Беларусі” (1993); малюнкі рэканструкцый “Замкі Беларусі”, лісты “Кірмаш на Беларусі ў ХVІІІ ст.” (усе 1977); “Хрыстос прызямліўся ў Гародні” паводле рамана У.Караткевіча (1978); “На куццю” паводле паэмы Янкі Купалы (1982); “Памяці Алены Кіш” (1983); “Паўстанне 1863 года на Беларусі” (1988); трыпціх “Усяслаў Чарадзей”, “Еўфрасіння Полацкая”, “Лазар Богша” (1996). Завершанасцю кампазіцый сінтэзам выяўленчых сродкаў вылучаюцца ілюстрацыі да кніг М.Багдановіча, А.Вольскага, В.Зуёнка, Міколы Гусоўскага і інш.
Камітэтам Ушанавання ганараваны медалём Герба “Пагоня” (25.03.1997) і адпаведным дыпломам. Занесены ў Кнігу гонару “Рупліўцы твае, Беларусь”.
У Старадарожскім мастацкім музеі экспануецца твор:
НМБ Шчамялёў Леанід Змітравіч (1923. Мінск).
“Партрэт мастака Яўгена Куліка”. 1978.
Палатно, алей. 115х96 см.
