Адраджэнцы Беларусi

САВІЦКІ Мікола Іванавіч

(04.02.1934, в. Паўлаўшчына Глыбоцкага р-на Віцебскай вобл.), беларускі вучоны ў галіне эканамічнай інфарматыкі, прафесар. Сябар клуба “Спадчына” (1988)

Скончыў Беларускі інстытут народнай гаспадаркі (1957). Выкладчык рахункова-бухгалтарскай школы ў Віцебску (1957 – 1959). Аспірант Маскоўскага эканоміка-статыстычнага інстытута (1960 – 1963). Кандыдат эканамічных навук (1963). Малодшы, старшы навуковы супрацоўнік Інстытута эканомікі АН БССР (1963 – 1964). З 1964 г. у Беларускім дзяржаўным эканамічным універсітэце: старшы выкладчык, дацэнт, прафесар, загадчык кафедрай (1965 – 1986), дэкан вячэрняга факультэта (1976 – 1978), прафесар кафедры (1986 – 2001). Звольнены з працы па палітычных матывах.

Аўтар навуковых прац па эканамічнай інфарматыцы, праграмаванні, тэхналогіі захоўвання і апрацоўкі звестак, аўтаматызацыі ўліку; стваральнік кафедры новых тэхналогій у гэтай галіне. Аўтар метадычна-навуковай літаратуры, дапаможнікаў і падручнікаў для эканамічных тэхнікумаў і ВНУ. Па яго падручніках вучацца студэнты і па сённяшні дзень. Надрукаваў звыш 100 навуковых прац. Аўтар першага “Руска-беларуска-англійскага слоўніка па інфарматыцы і вылічальнай тэхніцы” (1992), першых вучэбных дапаможнікаў на беларускай мове (1996, 2000). Пасля звальнення з працы ў 2001, 2003 і 2005 гадах падрыхтаваў і надрукаваў за мяжой (у Расіі) два вучэбныя дапаможнікі (на рускай мове), адзін з якіх выйшаў дзвюмя выданнямі. Гэтыя кнігі кіраўніцтва БДЭУ выдаць на беларускай мове не дазволіла.

Да 1995 г. шмат разоў атрымліваў узнагароды ад рэктарата і міністэрства: медалі, ганаровыя граматы, граматы, падзякі, грашовыя прэміі.

Па ўласнай пісьмовай заяве выйшаў з КПСС ў маі 1991 г. Сябар ТБМ імя Францыска Скарыны і ТБШ, некалькі скліканняў абіраўся ў вышэйшыя органы кіравання. Прымае актыўны ўдзел у рабоце БНФ “Адраджэнне”. Выступае ў друку, на канферэнцыях, дзе разглядаюцца праблемы нацыянальнай культуры, навукі і адукацыі. За ўдзел у мітынгу быў збіты і пасаджаны ў турму.

Камітэтам Ушанавання ганараваны медалём Герба “Пагоня” (23.03.1997) за актыўны ўдзел у нацыянальным Адраджэнні і змаганні за родную мову; імянным Срэбным пярсцёнкам з выявай Герба “Пагоня” і надпісам “Жыве Беларусь” (25.03.2003) і апаведнымі дыпломамі. Занесены ў кнігу гонару “Рупліўцы твае, Беларусь”.

У Старадарожскім мастацкім музеі экспануюцца: