ДУНІН-МАРЦІНКЕВІЧ Вінцэнт
(1807, б. фальварак Панюшкавічы Бабруйскага р-на – 17.12.1884), беларускі паэт, драматург, класік беларускай літаратуры ХІХ ст., тэатральны дзеяч. З сям’і арандатара. Скончыў Бабруйскую гімназію (1824), вучыўся на медыцынскім факультэце Пецярбургскага (па інш. звестках Віленскага) універсітэта. Перакладчык Мінскай епархіяльнай кансісторыі (1827), чыноўнік крымінальнай палаты (1831 – 1840). З 1840 г. жыў у фальварку Люцынка каля Івянца, дзе і пахаваны. Першыя творы на польскай мове не захаваліся. Аўтар лібрэта камічнай оперы “Ідылія”, пастаўленай створаным ім тэатральным калектывам (1846); вершаваных аповесцяў “Вечарніцы” (1855), “Гапон” (1855), “Купала” (1856), “Шчараўскія дажынкі” (1857), “Халімон на каранацыі” (1857); балады “Травіца брат-сястрыца” (1857); вершаванага апавядання “Быліцы, расказы Навума”; камедый “Пінская шляхта” (1886), “Сватаўство” (1870). У сваіх творах адлюстроўваў розныя бакі жыцця. Значнае месца ў літаратурнай спадчыне займаюць творы на польскай мове. За ўдзел у паўстанні 1863 –1864 гадоў арыштаваны, да 1870 г. быў пад наглядам паліцыі. Яго імя прысвоена Магілёўскаму абласному тэатру драмы і камедыі ў Бабруйску.
У Старадарожскім мастацкім музеі экспануюцца творы:
Аляксандр Сяргеевіч Шатэрнік (1940, Мінск).
“Галава Вінцэта Дуніна-Марцінкевіча”. 1982.
Гіпс. 48х39х42 см.
Мікола Мікалаевіч Купава (1946, Мінск)
“Партрэт зачынальніка новай беларускай літаратуры Вінцука Дуніна-Марцінкевіча”.
1976. Каляровы лінарыт. 30х20 см.
Яўген Мікалаевіч Ціхановіч (1911– 2005, Мінск).
“Партрэт Вінцука Дуніна-Марцінкевіча”. 1980.
Сухая іголка. 28х18,5 см.
Алесь Фінскі (1953, Мінск).
Медальён “Дунін-Марцінкевіч”. 1984.
Гіпс таніраваны, дошка.
Уладзімір Антонавіч Тоўсцік (1949, Мінск).
”Драматург В. Дунін-Марцінкевіч”. 1982.
Кардон, алей. 70х84 см.
Святлана Рыгораўна Гарбунова (1954, Мінск).
Медаль “В.Дунін-Марцінкевіч 1808 – 1884”. 1984.
Сілумін, ліццё. Дм – 17 см.
Генадзь Адамавіч Асташонак (1955, Мінск).
Медаль “Дунін-Марцінкевіч”. Да 175-годдзя з дня нараджэння. 1982.
Кераміка, дрэва. 7х7 см.